Leviticus 23

1UJehova wathi kuMosi, 2“Khuluma laba-Israyeli uthi kubo: ‘Le yimikhosi yami emisiweyo, imikhosi emisiweyo kaJehova okumele liyimemezele ukuba yimihlangano engcwele.

ISabatha

3“ ‘Kulezinsuku eziyisithupha elingasebenza ngazo, kodwa usuku lwesikhombisa liSabatha lokuphumula, usuku lomhlangano ongcwele. Lingenzi loba yiwuphi umsebenzi; loba lihlala ngaphi luliSabatha likaJehova.

Iphasika

4“ ‘Le yiyo imikhosi emisiweyo kaJehova, imihlangano engcwele elizayimemezela ngezikhathi zayo ezimisiweyo: 5Iphasika likaJehova liqalisa kusihlwa ngosuku lwetshumi lane lwenyanga yokuqala. 6Ngosuku lwetshumi lanhlanu lwaleyonyanga kuqaliswa uMkhosi kaJehova wesinkwa esingelamvubelo kube yizinsuku eziyisikhombisa lisidla isinkwa esengelamvubelo. 7Ngelanga lokuqala wobani lenkonzo engcwele futhi lingenzi msebenzi.

8Lenze umnikelo kuJehova otshiswe ngomlilo okwezinsuku eziyisikhombisa. Akuthi ngosuku lwesikhombisa libe lenkonzo engcwele lingenzi msebenzi.’ ”

Izithelo zokuqala

9UJehova wathi kuMosi, 10“Tshela aba-Israyeli uthi, ‘Nxa selingene elizweni engizalinika lona kalibokuthi lingavuna lilethe kumphristi ilixha lesivuno samabele akuqala.

11Kazunguze ilixha lelo kuJehova ukuze lamukeleke. Umphristi ufanele alizunguze ngelanga elilandela iSabatha. 12Ngelanga lokuzunguza ilixha umele wenze umhlatshelo ube ngumnikelo wokutshiswa kuJehova kube lizinyane lemvu eliduna eselilomnyaka libe ngelingelasici, 13uwunikele ndawonye lomnikelo wamabele oyingxenye yehefa ngokubili etshumini, kube yifulawa ecolekileyo ivutshwe ngamafutha. Lo ngumnikelo owenzelwa uJehova ngomlilo oloqhatshi olumnandi. Kawenziwe njalo lomnikelo wokunatha oba yingxenye yehini eyodwa kokune kuliwayini. 14Malingadli sinkwa loba inhlavu ezikhanzingiweyo kumbe ezintsha kuze kube yilelolanga eliletha ngalo umnikelo lo kuJehova yenu. Lokhu kakube yisimiso esingapheliyo kuzo zonke izizukulwane ezizayo kungenani ukuthi lihlala ngaphi.

Umkhosi wamaviki

15“ ‘Kusukela ngelanga elilandela iSabatha, ilanga elaletha ngalo ilixha lomnikelo wokuzunguza, balani amaviki ayisikhombisa agcweleyo. 16Balani izinsuku ezingamatshumi amahlanu kusiyafika ilanga elingemva kweSabatha lesikhombisa, bese liletha umnikelo wamabele amatsha kuJehova.

17Lokuba lihlala ngaphi lethani izinkwa ezimbili ezenziwe ngefulawa ecolekileyo eyingxenye yehefa ngokubili etshumini, siphekwe lemvubelo, kube ngumnikelo wezithelo zokuqala kuJehova. 18Lethani kanye lesinkwa lesi amazinyane embuzi amaduna ayisikhombisa, yilelo selilomnyaka ubudala njalo lingelasici, lenkunzi eseseliguqa lezinqama ezimbili. Zizaba ngumnikelo wokutshiswa kuJehova kanye lomnikelo wamabele lowokunathwayo umnikelo otshisiweyo ngomlilo oletha uqhatshi olumnandi kuJehova. 19Beselinikela ngempongo umnikelo wesono langamawundlu amabili alomnyaka owodwa abe ngumikelo wobudlelwano. 20Umphristi kumele azunguze amawundlu lawo womabili kuJehova njengomnikelo wokuzunguzwa kanye lesinkwa sezithelo zokuqala. Zingumnikelo ongcwele owomphristi kuJehova. 21Ngalo lelolanga memezelani inkonzo engcwele, lingenzi msebenzi. Lokhu akube yisimiso esingapheliyo ezizukulwaneni zenu ezizayo lingaze libe lihlala ngaphi.

22“ ‘Lapho livuna isivuno selizwe lakini lingavuni lasemaphethelweni amasimu enu futhi lingabuthi okukhithikayo lapho livuna. Lokhu kutshiyeleni abayanga labemzini. Mina nginguJehova uNkulunkulu wenu.’ ”

Umkhosi wamaThilongo

23UJehova wathi kuMosi, 24“Tshela aba-Israyeli ukuthi ilanga lakuqala lenyanga yesikhombisa lusuku lokuphumula, umbuthano ongcwele wokukhonzwa ngokutshaya ithilongo.

25Lingenzi msebenzi, kodwa yenzani umnikelo wokutshiswa kuJehova.’ ”

Usuku lokubuyisana

26UJehova wathi kuMosi, 27“Usuku lwetshumi lwenyanga yesikhombisa lilanga lokubuyisana. Wobani lenkonzo engcwele lizile ukudla, lilethe umnikelo wokutshiswa ngomlilo kuJehova. 28Lingasebenzi ngalelolanga, ngokuba lilanga lokuBuyisana, lapho lihlawulelwa kuJehova uNkulunkulu wenu.

29Lowo ongaziliyo ngalelolanga makasuswe ebantwini bakibo. 30Lowo osebenzayo ngalelolanga ngizambhubhisa phakathi kwabakibo. 31Lulisabatha lenu lokuphumula njalo limele lizile. 32Kusukela kusihlwa ngelanga lesificamunye lwenyanga kuze kube kusihlwa ngelanga elilandelayo ligcine isabatha lenu.’ ”

Umkhosi weZihonqo

33UJehova wathi kuMosi, 34“Tshela aba-Israyeli ukuthi ilanga letshumi lanhlanu ngenyanga yesikhombisa uMkhosi kaJehova weZihonqo kawuqalise, uqhubeke okwezinsuku eziyisikhombisa. 35Ilanga lokuqala ngelenkonzo engcwele; lingenzi umsebenzi wansuku zonke.

36Okwezinsuku eziyisikhombisa lethani iminikelo yokutshiswa kuJehova, kuthi ngosuku lwesificamibili libe lenkonzo engcwele lilethe umnikelo wokutshiswa kuJehova. Yinkonzo yokuvala; lingenzi msebenzi wansuku zonke.

37(“ ‘Le yimikhosi kaJehova emisiweyo elizayimemezela njengezinkonzo ezingcwele ezokuletha iminikelo yokutshiswa kuJehova – iminikelo yokutshiswa, leminikelo yamabele, imihlatshelo leminikelo enathwayo efunekayo insuku ngensuku. 38Iminikelo le ngengaphezu kwaleyo eyamaSabatha kaJehova njalo ngaphezu kwezipho zenu lalokho eliyabe lifungele ukukupha langaphezulu kweminikelo yonke yokuzithandela eliyinika uJehova.)

39“ ‘Yikho-ke kusukela ngosuku lwetshumi lanhlanu olwenyanga yesikhombisa ngemva kokuba selivunile amabele akulelolizwe wobani lomkhosi wokuthokoza kuJehova okwezinsuku eziyisikhombisa. Elokuqala lilanga lokuphumula, kanye lelesitshiyagalombili lalo lilanga lokuphumula. 40Ngelanga lokuqala libokukha izithelo ezinhle zezihlahla, izingatsha zamalala, izingatsha zezihlahla ezilamahlamvu amanengi lemidubu lijabule phambi kuka Jehova uNkulunkulu wenu lonke, okwezinsuku eziyisikhombisa. Lesi kasibe yisimiso esingapheliyo ezizukulwaneni ezizayo; umkhosi liwenze ngenyanga yesikhombisa. 41Gcinani umkhosi lo kaJehova minyaka yonke okwezinsuku eziyisikhombisa. Lesi kasibe yisimiso esingapheliyo ezizukulwaneni ezizayo; umkhosi liwenze ngenyanga yesikhombisa.

42Libohlala ezihonqweni okwezinsuku eziyisikhombisa. 43Bonke aba-Israyeli ngokuzalwa kumele bahlale ezihonqweni, ukuze izizukulwane zenu zazi ukuthi ngahlalisa aba-Israyeli emadumbeni mhla ngibakhipha eGibhithe. Mina nginguJehova uNkulunkulu wenu.’ ”

44Ngakho uMosi wasebabikela aba-Israyeli ngemikhosi emisiweyo kaJehova.